ប្រធានក្រុមប្រឹក្សាស្រុកស្ទោង កោតសរសើរប្រជាពលរដ្ឋឃុំម្សាក្រង ដែលបានចូលរួមតាមដាន និងគាំទ្រការអភិវឌ្ឍមូលដ្ឋាន
(កំពង់ធំ)÷ ប្រធានក្រុមប្រឹក្សាស្រុកស្ទោង កោតសរសើរប្រជាពលរដ្ឋឃុំម្សាក្រង ដែលបានចូលរួមតាមដាន និងគាំទ្រការអភិវឌ្ឍមូលដ្ឋាន លោក ឡាយ ស៊ីលី ប្រធានក្រុមប្រឹក្សាស្រុកស្ទោង បានសម្តែងនូវការកោតសរសើរខ្ពស់ចំពោះប្រជាពលរដ្ឋនៅក្នុងឃុំម្សាក្រង ដែលបានយកចិត្តទុកដាក់តាមដាន ស្វែងយល់ និងចូលរួមផ្តល់មតិយោបល់លើការអនុវត្តកម្មវិធីវិនិយោគរបស់រដ្ឋបាលឃុំ ក៏ដូចជាសកម្មភាពអភិវឌ្ឍនានាដែលអនុវត្តដោយក្រុមការងារចុះមូលដ្ឋាន និងដៃគូអភិវឌ្ឍន៍ផ្សេងៗ។
ការលើកឡើងនេះ បានធ្វើឡើងក្នុងវេទិកាពិគ្រោះយោបល់របស់ក្រុមប្រឹក្សាស្រុកស្ទោង ដែលរៀបចំឡើងនៅឃុំម្សាក្រង នាព្រឹកថ្ងៃទី១៩ ខែមិថុនា ឆ្នាំ២០២៦ ដោយមានការចូលរួមពីថ្នាក់ដឹកនាំស្រុក អាជ្ញាធរមូលដ្ឋាន មន្ត្រីជំនាញ និងប្រជាពលរដ្ឋជាច្រើននាក់។
លោកប្រធានក្រុមប្រឹក្សាស្រុក បានមានប្រសាសន៍ថា ការចូលរួមរបស់ប្រជាពលរដ្ឋក្នុងការតាមដាន និងវាយតម្លៃលើការអនុវត្តគម្រោងអភិវឌ្ឍនៅមូលដ្ឋាន គឺជាកត្តាសំខាន់ដែលជួយធានាឱ្យការអនុវត្តការងារមានតម្លាភាព ប្រសិទ្ធភាព និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ។
លោកបានបន្តថា ការយល់ដឹងរបស់ប្រជាពលរដ្ឋចំពោះកម្មវិធីវិនិយោគ និងសមិទ្ធផលនានានៅក្នុងមូលដ្ឋាន បានឆ្លុះបញ្ចាំងពីការរីកចម្រើននៃការផ្សព្វផ្សាយព័ត៌មាន និងការចូលរួមរបស់សហគមន៍ក្នុងដំណើរការអភិវឌ្ឍតាមបែបប្រជាធិបតេយ្យនៅថ្នាក់មូលដ្ឋាន។
ជាមួយគ្នានេះ លោកក៏បានលើកទឹកចិត្តដល់ប្រជាពលរដ្ឋបន្តចូលរួមផ្តល់មតិយោបល់ សំណូមពរ និងសំណួរផ្សេងៗ តាមរយៈវេទិកាសាធារណៈនានា ដើម្បីឱ្យអាជ្ញាធរមានមូលដ្ឋានក្នុងការដោះស្រាយបញ្ហា និងរៀបចំផែនការអភិវឌ្ឍឱ្យកាន់តែមានប្រសិទ្ធភាព ស្របតាមតម្រូវការរបស់ប្រជាពលរដ្ឋ។
វេទិកាពិគ្រោះយោបល់នេះ ក៏ជាឱកាសមួយសម្រាប់អាជ្ញាធរមូលដ្ឋាន និងប្រជាពលរដ្ឋ បានជួបពិភាក្សាផ្ទាល់ ផ្លាស់ប្តូរមតិយោបល់ និងពង្រឹងកិច្ចសហការរវាងអាជ្ញាធរ និងប្រជាពលរដ្ឋ ក្នុងគោលបំណងរួមចំណែកលើកកម្ពស់ការអភិវឌ្ឍមូលដ្ឋានឱ្យកាន់តែមានចីរភាព និងប្រសិទ្ធភាព។
